☺ DI FRÓINDE

HIN UN HEA


DI FRÓINDE


- Kanst an mich glóbe, Hannes, wenn ich són das es wércklich passiad is, is es woa.
- Ich meecht es awa net so órich gern ón holle, Nesto! Wonê het ma mo sowas gedenkt fon so énem enste mann als wi de Mindo? Es kan nohre geschpreech sinn!
- Iá, Hannes, es geschpreech is awa grohs.. All reete se driwa, un all chulte se de Mindo.
- Un mea, Nesto, was mache mea? Tun ma tsu ihnem chtehn, oda gehn ma gegend ihnem?
- Es wiste ich óch net són. Mea misse uns alles mo richtich un gedultlich foa sihn, fa wisse wi ma met denna unfahoftne chwirichkhéde wo do tsum foa chain komm sinn, umm gehn.
So léeft es geschpreech tswischen em Hannes un em Nesto iwa de Mindo. Di drai wóre grosse fróinde in alla tsaite un alla chwirichkhéde, awa iets is ene hôrriche geschprooch foa komm iwa de Mindo, un all hon se sich gegend de mann geschtellt.
Di tswói wóre do unna sich am sihn ob se tsu oda gegend de Mindo gengte. Es wó en chrôo situatsion...
Kétslich is in de Ville foa komm das en medche mit draitsen ioa weat getswun gieb fa sex se mache, un dôrrich das weat es chrôo fakuiniad gieb fon em mann. Es is tswói tóhe im hospital geblieb un mist noch en halleb ioa gehénn tratament mache fa nommo gesunt giebe fon denna beláidigung.
Un di proofe tswunge tsum Mindo wall ea an dem tóh wo das passiad is, wód in dem medche's haus un hot di kich reformiad. Ea wód ene chtell-maista.
Nô de passirung, hot ea awa ima engstlich gesód:
- Ich hon nohre das medche móins frii gesihn wi ihnes di hinkle fittre gang is, un dô, nô mittag wi ihnes am chróie wód nô hilf. Do sin ich tsu ihnes fa es rette gehn.
All in de ville sóre awa ea weat es chult. Es medche kont net fill debai són wall ihnes hat nohre de mann gegend es licht gesihn, un so hot es net richtich sain gesicht gesihn.
Wi es passiad is, do hot es medche geschróit. Mindo - in sain version, sód het alles flie geloss un is in di millie-hit geschprung fa sihn was am passire weat. Un, an chtats es medche sich helfe losse, hot es óngefang se chróie das ea weat de violente mann wo ihnes gehasst het.
Mindo is in de catee wall di lait hon ea bai em medche ón getroff. Ihnes blutich un in chock, un de mann debai, mit ihnes in sain hende.
Di tswói fróinde hon sich foa geholl dere net an di villasch version glóbe. Si dere an saine fróind glóbe wall wenn si nics fa ea mache dere, niemand ted sich drón gewe ihnem helfe.
Hannes un Nesto sin bis an di millie-hit gang fa sihn wo es passiad weat. Wenn si etwas sihn dere oda finne dere, filaicht en proof, kennte si de Mindo aus de catee bringe.
Si harre glick. Tswischen em millie lób in de millie-hit hon si ene hemmda knopp gefun. Es wód di proof wo si hon muste fa an de Mindo glóbe un fon de catee livvre wall ea hat an dem tóh en camiset ón gehatt wo ken knepp hat.
Das chteck is gelóf biss si raus gefun hon das wea das chult wód mit de tswungung des sex mit em medche wód saine áichne fatta. Un wi alles weatlich raus komm is, is ea in di catee komm. Un ea is noch bis hait dort.
Awa was ich wollt tsaiche in dem geschichtche is wi important in em lewe ene fróind is. Wenn di tswói net wehre suche gang un net herre de knopp gefun, weat de fróind noch dreckich in de ville un noch in de catee bis hait.
Fróinde das sin grosse kunste in unsa lewe un mit denna gehn mea fill laichta dôrrich di chwirichkhéde. Ene parent is nii so fa uns als ene fróind, wall nohre di fróinde chtehn fa uns ohne wolle driwa was fadiene.
Di fróinde khenne unsa gehénn alsmo bessa faschtehn als mea sellebst un si begráife glaich unsa gefihl.
Fróinde sin bissie fon unsrem áichne gefihl un fill fon unsa lewe. Halt si fest, si sin gold weat.