Bissie Gelô - Di Kuss

Ouça este texto gravado aqui: Hea das graveadne chteck hia:


DI KUSS

In de ganse tsaite in de wellt is es ima passiat das di lait wo en gescheft honn, etwas getun honn fa meh lait bai bringe in das gescheft.
So, in alla faschiedene geschefta, wet gepléent was mache fa es bessa lóofe. So
finne fill raus, das ene gute weech in dem práiss is de práiss fon de article niedra mache wall so komme meh lait bai fa se kóofe.
Andere geschefts menna finne raus das es gut is wenn si fon de beste article bai
stelle, das di lait kóofe komme weche de kwalitet des article. Dan alsmohls, falêere si bis gelt an êtliche article, awa wal es ene rufung des kunne is, dan giebt es noch en gut gescheft.
Es giebt noch di wo ménne wenn am gescheft en gut bedienung ón gebot giebt, es ted óoh kunne bai bringe. Un das is en wôachéd: di lait wolle émfach gut bedient gewe. Ma kann sóon das haitsestóoche enes fon de beste kunste is di lait gut bediene. Si komme ima tsurrick.
Awa in Klappatól, hot ene geschefts mann ene gute austruck raus gefunn fa di kunne bai bringe. Ea hot en chehn blond medche ón genómm fa bai ihnem im gescheftshaus chaffe.
Un, wea ted meh wi hunnad mill in sainem gescheft gastire, grecht en kuss.
Do hot foa em geschefts haus geschtann: “KÓOF FA MEH WI HUNNAD MILL, DAN FADIENST DU EN KUSS VON DE TSILL!”
Di lait honn glaich gesihn das do das chehnes blondes medche am bediene weat, un, sicha noh hunnad mill gastire, grechte si en kuss.
Do is ene bub renn komm, hot no dem blondes medche gekukt, sain bruste beôbacht, sich belekt, un hot óngefang se gastire.
Es wód chlimm an hunnad mill komme. Ea hat chonn alles kóft un hot noch gefehlt fa an so fill gelt komme. Do, horra noch waisse tswénn kóft fa di muddi, ene phóo holts chlappe fa di wowo, ene pottmonêe fa de pabai wall ea glaich gebuats tóh het un tswói hegel nodle fa sain chetsie. Di rechnung is an acht un nóintsich mill komm. So, ea mit de auge nohre uf dem blond medche sain brust, un mit de kuss im kopp, hot noch bissie gedenkt, do is ea an noch was komm: ea must de hémm noch ene iskêre honn fa de oofe ón chteche. Es fossfaia wód tsu daia.
Do hot ea es kóft. Di rechnung is an hunnad fia mill gang. Do sóora fics:
- No iach dan! Grihe ich iets mein kuss?
- Gewiss! - Antwort es blondes chehnes medche. - Do ruuft ihnes:
- Wowo! kómm mohl hea! Do is noch ene dummkopp wo fon dea gekusst gewe will! Ea hot meh wi hunnad mill gastiad.
(ieda enlichkaite sin nua cointsidensen).