HIN UN HEA - MAIN FERIE

Ouça este texto aqui:

MAIN FERIE
In em monat Janua sin ich tsehn tóohe tsu Santa Catarina gefó, bis ans mea, fa se ruhe. Es is únnschraiblich wi di praias un das mea dort chehn sin. di natua hot ecstra caprischead un mea hon tsehn ecstra chehne sonne tóohe grid.
Mea hon an de praia Itapema veraniead. Das plats lait in en baíi, úngefea fênnef kilometa lang. An de tswói chpitse fon de baíi wo in es mea sich projetire tun, sin hohe bérriche um di baíi, all noch gans foll ua wald, gród so wi annre bérriche wo ma sihn kan, sin all óh foll wald.
Es wassa fon em mea is so sauwa, das ma en meta tief im wassa noch di fies sihn kann. Di welle wo sich hebe sin nie meh wi en meta hoh, un denna saine chaum is so waiss, das ém sain aue weh tuhn dôrrich de sonne blink. Es is ene iwa waisse chaum.
Dort brauch ma khéen bang hon fon de lecha in em wassa wall es di net gibt. Ma muss nohre sich ufpasse fa net gans faphetst gewe fon unsa fróo, wall es gibt ausnams chehne med dort am mea. Dan gehn émfach unsa aue de kérwa nôo. Un do kamma sich di sott raus suche: fon dicke óschbacke ora klene memme, alla sotte desfilire do rom. Es chlimste is is awa émfach unsa fróo saine kopp denna med ónsetse. Wall, di sin gemenahand so dumm wi muhle. Un di chláuichkhéd fon usa fróo is chlimm se nôo mache.
Awa noch iwa di ferie, dort hon mea en radio chtatsion raus gefunn, di wóod ecstra. Hot ieda foa nacht, fon secs bis sieben, ene daitsche music programm apresentiad. De locutoa hot tsu brasiliónisch di daitsche chtiffe tradusiat un ausgelegt was di wollte sóon damit. Das weat ene esctra faine radio programm wo do hia fill success mache ted, wenn'a óngekrint gebt. Bis di propagande sin uf daitsch un demnô uf portugiesisch gesód geb.
Ferie sin so nôdwenich wi esse ora chloofe. De mensch muss mohl im ioa phóo tóohe ruhe, etwas ánischta tuhn wi das wo'ra gewehnt is. Un es beste wi ma mache kann, is di familie holle un wait fott fóore, fa nics fon sain plats gewó gewe.
Dann, hellt ma di khenna un tud mo mechtich mit denna chpille. Im sand ora mit en kuuchel, was di khenna wolle is unsa companii un das mea mit denna sain chpilerai mit mache.
Un so kimmt ma nai fon de praia tsurrick, gans reciclead. Mit de ganse chpess wo ma gerriss hon, het negst net es wassa fon em mea gebraucht, awa di gesunthéd fon dem saltsich wassa macht uns óoch mechtich gut.